Tez-tez verilən suallar

Tədrisin təşkili

Fakültədə dərslər mühazirə, məşğələ və layihə formatında tədris edilir. İxtisaslardan asılı olaraq layihəyönümlü fənlər kurs layihəsi və kurs işindən ibarətdir. Bunlar bir-birini ardıcıl şəkildə tamamlayaraq bütün tədris boyu davam edir.  

Tələbənin biliyi maksimum 100 balla qiymətləndirilir. Bundan 50 balı tələbə semestr ərzində, 50 balı isə imtahanda toplayır. Semestr ərzində toplanan 50 bala aşağıdakılar aiddir:

-dərsə davamiyyətə görə  - 10 bal

-sərbəst işə görə - 10 bal

-məşğələ, seminar və ya laboratotiya dərslərinin nəticələrinə görə - 30 bal

Əgər fənn üzrə kurs işi (layihəsi) nəzərdə tutulubsa, onda məşğələ (seminar) və laboratoriya dərslərinə görə 20 bal, kurs işinin (layihəsinin) hazırlanması və müdafiəsinə görə 10 bal verilir. 

Tələbənin imtahanda topladığı bal, 17 baldan aşağı olmamalıdır. Fənn üzrə ayrılmış bütün saatların 25%-dən çoxunda iştirak etməyən tələbə həmin fənnin imtahanına buraxılmır. 

Fənn üzrə semestr ərzində toplanmış balın yekun miqdarına görə tələbənin biliyi Avropa Kredit Transfer Sisteminə (AKTS) görə aşağıdakı kimi qiymətləndirilir:

51 baldan aşağı	- "qeyri-kafi" (F)
51-60 bal	- "qənaətbəxş" (E)
61-70 bal	- "kafi" (D)
71-80 bal	- "yaxşı" (C)
81-90 bal	- "çox yaxşı" (B)
91-100 bal	- "əla" (A)

 

4-cü kurs tələbələri, sonuncu (VIII) semestrdə müvafiq ixtisaslara aid müəssisə və qurumlarda təyin edilmiş təcrübə rəhbərinin nəzarəti ilə 14 həftəlik “Texnoloji İstehsalat təcrübəsi” keçir və sonda 100 ballıq sistem üzrə universitetdə yaradılmış komissiya tərəfindən qiymətləndirilir.

Tələbələr Yekun attestasiya üzrə buraxılış işini müdafiə edərək universiteti bitirmiş hesab edilirlər. 

İmtahanlar universitet tərəfindən mərkəzləşdirilmiş test və yazılı formatda təşkil edilir, layihəyönümlü və qabiliyyət tələb edən rəsm, rəngkarlıq, heykəltəraşlıq və maketləşdirmə kimi fənlərin imtahanları isə fakültədə keçirilir. Tələbə işləri (kurs layihələri, maketlər, rəsm və s.)  kodlaşdırılır və fakültə tərəfindən tərtib edilmiş xüsusi meyarlara əsasən komissiya tərəfindən qiymətləndirilir. Müvafiq ixtisaslar üzrə təhsil alan tələbələr təhsil aldığı müddətdə hər hansı fənn üzrə semestr imtahanını müvəffəqiyyətlə vermədiyi halda, akademik borc yaranır. Akademik borcun ləğv edilməsi üçün tələbənin dekanlığa müraciəti əsasında müvafiq semestr üzrə fərdi və alt qruplar üzrə dərslərdə iştirak edir və semestrin sonunda imtahan təşkil edilir. “Ali təhsil müəssisələrinin bakalavriat və magistratura səviyyələrində və Azərbaycan Milli Elmlər Akademiyasının magistratura səviyəsində kredit sistemi ilə tədrisin təşkili Qaydalarının təsdiq edilməsi haqqında” Azərbaycan Respublikası Nazirlər Kabinetinin 2013-cü il 24 dekabr tarixli, 348 nömrəli qərarında dəyişikliklər edilməsi barədə 3.2.14 bəndinə əsasən akademik borcun ləğv edilməsi üçün tələbənin dekanlığa müraciəti əsasında uyğun semestr üzrə müvafiq fənnin kreditinin 25 % ödənişilə təkrar imtahan verərək akademik borcunu ləğv etməsi imkanı mövcuddur.

Təhsil haqları

Dizayn ixtisası üçün təhsil haqqı 2500 azn-dir.  Əcnəbi tələbələrin təhsil haqqı isə 2500 usd –dir. Mövcud qaydalara əsasən sessiyanın nəticələri üzrə dövlət sifarişi ilə təhsil alan tələbələrin sayı qədər təqaüd yerləri ayrılır və müsabiqədə ödənişli tələbələr də iştrak etməklə onlara əlaçı, zərbəçi və adi təqaüdlər verilir. Hər semestr tələbələrə əlavə təqaüd yerləri də ayrılır ki, bu zaman akademik kredit borcu olmayan tələbələr də təqaüd almaq imkanlarına malik olurlar.

Beynəlxalq əlaqələr

AzMİU-nun İtaliya ilə əlaqələri genişdir. 2018-ci ildə dövlətlərarası imzalanmış müqaviləyə əsasən Universitetdə Milan Politexnik Universiteti ilə birlikdə İtaliya–Azərbaycan Dizayn mərkəzi yaradılmışdır. Son illər İtaliya səfirliyinin təşəbbüsü ilə AzMİU-nun müəllim və tələbələrinin italyan memar və dizaynerlərlə görüşləri keçirilir. Belə ki, 2017-ci və 2018-ci ilin mart ayında Azərbaycan Memarlıq və İnşaat Universitetində İtalyanın Azərbaycandakı Səfirliyi və İtaliya Müəssisələrinin Təşviqi və Beynəlmiləlləşdirilməsi Təşkilatı (ICE) tərəfindən təşkil olunmuş və dünyanın 100-dən çox ölkəsində “Italy’s Design Day-İtalyansayağı Dizayn Günü” adı altında həyata keçirilən tədbir Azərbaycanda AzMİU-nun bazasında baş tutmuşdur.

Fakültənin   Türkiyə, Qazaxıstan, Gürcüstan, Rusiya memarlıq məktəbləri, Ukrayna, Florensiya, MilanTexniki, Lissabon Universitetləri, Fransa Memarlıq məktəbləri ilə əlaqələri genişdir.

Beynəlxalq müsabiqələr

Fakültə məzunlarının bakalavr və magistr səviyyəsi üzrə buraxılış işləri və dissertasiyaları MDB ölkələri memarlıq universitetləri müsabiqəsində (MOOCAO), Bakıda keçirilən regional festivallarında buraxılış işləri fəxri yerlərə layiq görülmüşdür.

Master-klasslar

Fakültənin mütamadi olaraq tanınmış beynəlxalq və yerli şirkətlər və mütəxəssislərlə master-klassları keçirilməkdədir.

Əməkdaşlıq sahələri

Fakültə Respublikanın Şəhərsalma və Arxitektura Komitəsi, Azərbaycanın Fövqəladə Hallar Nazirliyi, Mədəniyyət və Turizm Nazirliyi, Bakı Şəhər İcra Hakimiyyəti, "İçərișəhər Dövlət Tarix-Memarlıq Qoruğu İdarəsi, Dənizkənarı Bulvar İdarəsi, Milli Elmlər Akademiyasının Memarlıq və İncəsənət İnstitutu, Azərbaycan Milli Xalça Muzeyi, Azərbaycan Milli İncəsənət Muzeyi, Müasir İncəsənət Muzeyi, YARAT Müasir İncəsənət Məkanı eləcə də müxtəlif Memarlıq və Dizayn üzrə firma və șirkətlərlə təcrübi və elmi sahadə sıx əlaqələri davam etdirir.

Karyera imkanları

Fakültənin tələbə və magistrləri "Azərdövlətlayihə", "Azərtikintilayihə", "Bakıdövlətlayihə" layihə institutlarında, İçərişəhər Dövlət Tarix-Memarlıq qoruğunda, "PAŞAİNȘAAT", PMD, "EmbaWOOD", "Aksessuar İnșaat", “Knauf” kimi tanınmış șirkətlərdə istehsalat təcrübəsi keçir və uğurla çalışırlar.

Fakültənin müəllim və tələbələri mütəmadi olaraq fərdi yaradıcılıq sərgiləri, buraxılış işləri və magistr dissertasiyası sərgilərinin təşkilində də fəallıq göstərirlər. Tələbələr respublikanın və universitetin şənliklərində, xeyriyyə aksiyalarında yaxından iștirak edirlər.