Universitetimizdə “Məzunlarımızı tanıyaq” layihəsi çərçivəsində növbəti görüş keçirilib

Azərbaycan Memarlıq və İnşaat Universiteti (AzMİU) Tələbə Həmkarlar İttifaqı Komitəsi (THİK) və AzMİU Medianın təşkilatçılığı ilə “Məzunlarımızı tanıyaq” layihəsi çərçivəsində növbəti görüş keçirilib. Bu görüş AzMİU-nun İnşaat fakültəsinin məzunu, Yüksəliş müsabiqəsinin qalibi Orxan Şamilzadə ilə təşkil olunub.

Görüşün açılışında THİK sədri Şahmar Rəfili çıxış edərək Orxan Şamilzadəni tədbir iştirakçılarına təqdim edib, layihənin məqsəd və əhəmiyyətindən bəhs edib. O qeyd edib ki, layihənin əsas hədəfi məzunların tanıdılması, tələbələrlə onların qarşılıqlı əlaqələrinin qurulması, eləcə də tələbələrin peşə motivasiyasının artırılması üçün əlverişli mühitin yaradılmasıdır.

Daha sonra İnşaat fakültəsinin dekanı, dosent Sahib Fərzəliyev çıxış edərək Azərbaycan Memarlıq və İnşaat Universitetində tələbələr üçün mövcud imkanlardan və universitetin elmi-texniki bazasından danışıb.

Görüşün əsas hissəsində Orxan Şamilzadə öz tələbəlik illərindən, əldə etdiyi peşəkar təcrübələrdən və uğur hekayəsindən bəhs edib. O, tələbələri universitetdə mövcud şəraitdən maksimum yararlanmağa, əldə etdikləri bilik və bacarıqları gələcək fəaliyyətlərində tətbiq etməyə təşviq edib.

Tələbələrin böyük marağına səbəb olan görüş interaktiv formatda davam edib. 

Qeyd edək ki, “Məzunlarımızı tanıyaq” layihəsi çərçivəsində AzMİU-nu bitirmiş və hazırda müxtəlif sahələrdə uğur qazanan məzunların tələbələrlə görüşləri təşkil olunur. Bu görüşlər vasitəsilə məzunlar öz peşəkar təcrübələrini bölüşərək tələbələrin istehsalatla bağlı bilik və bacarıqlarını artırmağa töhfə verəcəklər.