AzMİU və "İnnab" peşəkar təlim platforması tələbələrə MOSE sertifikatı üzrə uğurlu karyera yolu təqdim edir

Azərbaycan Memarlıq və İnşaat Universiteti (AzMİU) və "İnnab" Peşəkar Təlim Platforması arasındakı əməkdaşlıq çərçivəsində MOSE (Microsoft Office Specialist Excel Expert) sertifikatı üzrə təqaüd proqramına seçim imtahanından uğurla keçən tələbələrlə onlayn görüş təşkil edilib.

Görüşdə "İnnab Business School"un direktoru Rauf Hacıyev və AzMİU-nun İKT Mərkəzinin direktoru Sərxan Talıbzadə iştirak edib. Onlar tələbələrə MOSE sertifikatının mahiyyəti, peşəkar inkişaf və iş dünyasında gətirəcəyi üstünlüklər barədə geniş məlumat verib. O, Excel üzrə mütəxəssis səviyyəsi olan bu sertifikatın tələbələrin iş bazarında daha rəqabətqabiliyyətli olmasına və karyeralarında irəliləyiş əldə etmələrinə böyük töhfə verəcəyini vurğulayıb.

Sertifikata maraq göstərən tələbələr görüşdə Rauf Hacıyevə MOSE proqramının tələbləri, faydaları və tətbiq sahələri haqqında ətraflı suallar veriblər. Görüş tələbələrin gələcək karyeralarında istifadə edəcəkləri bu dəyərli bacarıqları daha dərindən başa düşmələrinə imkan yaradıb.

AzMİU və "İnnab" Peşəkar Təlim Platforması arasındakı bu əməkdaşlıq tələbələrin müasir və əhəmiyyətli peşəkar sertifikatlar əldə etmələrinə, iş bazarında uğur qazanmalarına və inkişaf edən texnologiyalarla ayaqlaşmalarına dəstək verir.