Alanya Alaaddin Keykubat Universitetinin müəllimi Orhun mübadilə proqramı çərçivəsində AzMİU-da qonaq olub

Türkiyənin Alanya Alaaddin Keykubat Universitetinin Xarici Dillər Məktəbində rus dili müəllimi, eyni zamanda Orhun mübadilə proqramının koordinatoru Ayşe Mercan Türk Universitetlər Birliyi tərəfindən həyata keçirilən Orhun Mübadilə Proqramı çərçivəsində Azərbaycan Memarlıq və İnşaat Universitetinin (AzMİU) Əcnəbi Dillər kafedrasının qonağı olub. Bir həftəlik səfər zamanı o, hər iki qurum arasında tədris və əməkdaşlıq sahəsində təcrübə mübadiləsi aparmaq məqsədilə müxtəlif görüşlər keçirib.

Ayşe Mercan AzMİU-nun Əcnəbi Dillər kafedrasının müəllim heyəti ilə keçirilən iclaslarda tədrisin təşkili, metodika, dərs materialları, sillabuslar və digər müasir tədris yanaşmaları barədə fikir mübadiləsi aparıb. Həmçinin, rus dili müəllimlərinin dərslərində iştirak edərək tədris prosesini yaxından izləyib. 

Türkiyəli qonağın AzMİU-da seminarı da təşkil olunub.  Seminarda Əcnəbi dillər kafedrasının əməkdaşları ilə yanaşı, universitetin digər akademik heyəti iştirak edib. 

Seminarda Ayşe Mercan  Alanya Alaaddin Keykubat Universitetinin tarixi, mövcud fakültələri, Xarici Dillər Məktəbində dillərin tədrisi və rus dili fənnində istifadə olunan tədris materialları barədə geniş təqdimatla çıxış edib, iştirakçıları  maraqlandıran sualları cavablayıb. Yekunda kafedranın müəllim heyəti tərəfindən türkiyəli qonağa xatirə hədiyyələri təqdim olunub, birgə foto çəkilib.

Ayşe Mercan səfər müddətində AzMİU-nun Beynəlxalq əlaqələr üzrə prorektoru professor Nərgiz Abdullayeva, Xarici əlaqələr şöbəsi və Orhun proqramı koordinatorluğu, İxtisasartırma fakültəsi, eyni zamanda müvafiq fakültə və kafedralar ilə işgüzar görüşlərə qatılıb. Bu görüşlərdə universitetin maddi-texniki bazası ilə yaxından tanış olub. 

AzMİU-dan böyük təəssüratlarla ayrılan qonaq faydalı əməkdaşlığın hər iki universitet üçün faydalı olacağına ümid etdiyini vurğulayıb.

Qeyd edək ki, Orhun Mübadilə Proqramı çərçivəsində 2022-ci ildə Alanya Alaaddin Keykubat Universitetinin bir müəllimi AzMİU-nun Tikinti-iqtisad fakültəsində işgüzar səfərdə olub. 2025-ci ilin may ayında isə AzMİU-nun iki müəlliminin adıçəkilən universitetə səfəri planlaşdırılır.