Azərbaycan dili və pedaqogika kafedrasının cari ildə 3 kitabı nəşr olunub

Azərbaycan Memarlıq və İnşaat Universitetinin (AzMİU) Azərbaycan dili və pedaqogika kafedrasının müdiri, filologiya üzrə fəlsəfə doktoru, dosent Salatın Əhmədova cari ildə üç dəyərli əsərini ictimaiyyətə təqdim edib. Bu nəşrlərin 2-si “Azərbaycan dilində işgüzar və akademik kommunikasiya”, “Ağstafa-Qazax bölgəsinin izahlı dialektoloji lüğəti” elmi-metodik, “Zəfər bizim zəfərimizdir” adlı kitabı isə milli-mənəvi dəyərlərin təbliği baxımından mühüm əhəmiyyət kəsb edir.

Universitetimizin bakalavriatura səviyyəsində təhsil alan tələbələrə tədris olunan “Azərbaycan dilində işgüzar və akademik kommunikasiya” fənninin öyrənilməsinə kömək məqsədilə eyni adlı dərs vəsaiti Salatın Əhmədovanın tərtibatçılığı ilə hazırlanıb. Bu vəsait müasir dövrün tələblərinə uyğun olaraq işgüzar və akademik sahədə ünsiyyət bacarıqlarının inkişaf etdirilməsi üçün dəyərli bir bələdçidir. Gənc mütəxəssislərin peşəkar ünsiyyətdə uğur qazanmasına və Azərbaycan dilində səlis ifadə bacarıqlarını təkmilləşdirməsinə zəmin yaradır. 

Onun elmi irsimizin bariz nümunəsi olan “Ağstafa-Qazax bölgəsinin izahlı dialektoloji lüğəti” Azərbaycan dilinin dialektal zənginliyini əks etdirir. Bölgə dialektlərinin qorunması və gələcək nəsillərə çatdırılması məqsədini daşıyan bu lüğət, dilçiliyimizdə xüsusi yerə malikdir. Əsər tədqiqatçılar və dilin milli rəngarəngliyini öyrənmək istəyən geniş oxucu auditoriyası üçün misilsiz mənbədir.

Üçüncü nəşr isə gənclərdə vətənpərvərlik ruhunun yüksəldilməsi məqsədi daşıyan “Zəfər bizim zəfərimizdir” kitabıdır. Azərbaycan xalqının milli qürurunu və azadlıq mübarizəsini təcəssüm etdirən bu kitab, oxuculara tarixi zəfər yolumuzu və Vətənə olan sevgimizi daha dərindən dərk etməyə imkan yaradır. Bu əsər, milli kimlik və vətənpərvərlik dəyərlərini gənc nəsillərə aşılayan bir nümunədir.

Salatın Əhmədovanın bu qiymətli nəşrləri, həm elmi biliklərin yayılması, həm də milli dəyərlərin təbliği sahəsində mühüm rol oynayır. Azərbaycan mədəniyyətinə, dilinə, eləcə də  gənclərin vətənpərvərlik  ruhunda tərbiyəsinə böyük töhfə verir.