Əməkdaşımız “Elmmetrik bazalar üzrə mütəxəssis hazırlığı” proqramını uğurla tamamlayıb

Azərbaycan Memarlıq və İnşaat Universitetinin (AzMİU) Strateji planlaşdırma şöbəsinin mütəxəssisi Nigar Abdullayeva Elm və Ali Təhsil üzrə Dövlət Agentliyinin dəstəyi, "Elsevier" və "Clarivate" şirkətlərinin birgə təşkil etdiyi “Elmmetrik bazalar üzrə mütəxəssis hazırlığı” proqramında uğurla iştirak edərək nailiyyət sertifikatı əldə edib.

Bildirək ki, “Elmmetrik bazalar üzrə mütəxəssis hazırlığı” proqramına 150 müraciətçi arasından seçilən 70 nəfər iştirakçı qatılsa da, yalnız 28 nəfər proqramı uğurla bitirib, "Elsevier" və "Clarivate" şirkətlərinin birgə sertifikatını əldə edə bilib.

Əməkdaşımız Nigar Abdullayeva proqramın yekun testlərini tam doğru cavablandıraraq maksimum nəticə göstərib və (Elsevier üzrə 102,5 bal; Clarivate üzrə 100 bal) təlim proqramını birinciliklə tamamlayıb.

Qeyd edək ki, 4 aylıq hazırlıq proqramının məqsədi ölkədə "Scopus" və "Web of Science" kimi elmmetrik və bibliometrik bazaları ekspert səviyyəsində tətbiq edə biləcək mütəxəssislər yetişdirməkdir. Proqramı uğurla tamamlayan bu mütəxəssislər elmi göstəricilərin ölçülməsini daha dəqiq aparacaq, tədqiqatçılara ədəbiyyat axtarışlarında dəstək göstərəcək, elmi işlərin dərci üçün keyfiyyətli jurnal seçiminə öz töhfələrini verəcəklər.