Tələbələrimiz qlobal miqyaslı informasiya bazası olan CİS-in əhəmiyyəti barədə məlumatlandırılıb

Azərbaycan Memarlıq və İnşaat Universiteti (AzMİU) Tələbə Həmkarlar İttifaqı Komitəsinin (THİK) nəzdində fəaliyyət göstərən Biznes Klubun təşkilatçılığı ilə "Günümüzün bir parçası olan coğrafi informasiya sistemimiz" adlı təlim keçirilib.

Biznes Klub tərəfindən “Təcrübəli Mütəxəssislərlə Mentorluq Proqramı” çərçivəsində reallaşdırılan təlimdə çıxış edən THİK sədri Şahmar Rəfili bu tip təlimlərin tələbələr üçün olan faydasından danışıb.

Sonra söz təlimçi Nurlan Qənbərova verilib. O, təlim boyu iştirakçılara Coğrafi İnformasiya Sistemləri (CİS) barədə dolğun və əhatəli məlumatlar təqdim edib. Qeyd edib ki, CİS məkan (coğrafi) məlumatları və onlarla bağlı lazımi obyektlər barədə informasiyanın toplanması, saxlanması, təhlili və qrafik vizuallaşdırması sistemidir. Sistemin əsas istifadə sahələri şəhər planlaşdırılması, kənd təsərrüfatı, ətraf mühitin idarə edilməsi, fövqəladə halların idarə edilməsi və digər sahələrdir. Onun üstünlükləri isə coğrafi məlumatları xəritələr, qrafiklər şəklində vizuallaşdırması ilə daha başa düşülən hala gətirməsi, coğrafi məlumatları analiz edərək trendləri öyrənməyə şərait yaratmasıdır.

İnteraktiv formada keçirilən təlimin davamında mövzu ətrafında iştirakçılarla birgə müzakirələr aparılıb, onları maraqlandıran suallar cavablandırılıb.