AzMİU-da “Sahibkarlıq düşüncə tərzi” mövzusunda infosessiya keçirilib

Azərbaycan Memarlıq və İnşaat Universitetində (AzMİU) tələbələrin innovativ ideyalarının reallaşdırılması və startap layihələrinə qoşulmalarına dəstək məqsədilə “Sahibkarlıq düşüncə tərzi” mövzusunda infosessiya təşkil olunub. Tədbir Su təsərüffatı və mühəndis kommunikasiya sistemləri fakültəsinin tələbələri üçün keçirilib.

Infosessiyada çıxış edən AzMİU-nun İnnovativ Biznes və İnkubator bölməsinin rəhbəri Rasim Abdullayev universitetdə startap layihələrinin dəstəklənməsi istiqamətində görülən işlərdən danışıb. O, sahibkarlıq düşüncə tərzinin formalaşması, ideyaların startapa çevrilməsi, inkişafı və real investisiya mühitinə çıxarılması üsulları haqqında ətraflı məlumat verib.

Tədbirdə startap anlayışı, bu sahənin verdiyi üstünlüklər, innovativ düşüncənin biznes inkişafına təsiri və yaradıcı yanaşmanın faydaları geniş şəkildə izah olunub. Rasim Abdullayev tələbələri risk almağa, yaradıcılıqlarını sərbəst şəkildə ifadə etməyə və cəmiyyətə faydalı işlər görməyə təşviq edib.

Sonda tələbələrə təhsilləri ilə yanaşı, innovativ layihələrdə iştirak edərək karyera qurmaq imkanlarının önəmi vurğulanıb. Tədbir iştirakçıları mövzu ilə bağlı suallarını səsləndirib və faydalı tövsiyələr əldə ediblər.