Bədii yaradıcılıq festivalında AzMİU-nun iki tələbəsi yüksək yeri tutub

Xalqımızın Ümummilli Lideri Heydər Əliyevin 101-ci ildönümü ilə əlaqədar ali təhsil müəssisələrinin tələbələri arasında keçirilmiş bədii yaradıcılıq müsabiqə-festivalının qalibləri mükafatlandırılıb.

Mükafatçılar sırasında Azərbaycan Memarlıq və İnşaat Universitetinin (AzMİU) Nəqliyyat fakültəsinin tələbəsi Vüqar Süleymanlı, Su təsərrüfatı və mühəndis kommunikasiya sistemləri fakültəsinin tələbəsi Arif Qurbanov da yer alıb.

Mərasimdə elm və təhsil nazirinin müavini Firudin Qurbanov, Təhsil İşçiləri Azad Həmkarlar İttifaqı Respublika Komitəsinin sədri Araz Paşayav, Azərbaycan Memarlıq və İnşaat Universitetinin THİK-nin sədri Şahmar Rəfili, tələbələr və digər qonaqlar iştirak ediblər.

Çıxış edənlər festival qaliblərini təbrik edib, onlara gələcək həyat və fəaliyyətlərində uğurlar arzulayıblar.

Daha sonra müsabiqə-festivalda qalib gələn tələbələrə fəxri-fərman və qiymətli hədiyyələr təqdim olunub.

Bildirək ki, müsabiqə-festivala respublika üzrə 26 ali təhsil müəssisəsindən 3000-dən çox tələbə qatılıb.

Layihənin əsas məqsədi tələbələri milli vətənpərvərlik, mədəniyyətimizə, incəsənətimizə, milli adət-ənənələrimizə hörmət ruhunda tərbiyə etmək, onların bədii-estetik səviyyəsini yüksəltmək, incəsənət və mədəniyyətimizin ayrı-ayrı sənət növləri üzrə istedadlı gəncləri üzə çıxarmaq, asudə vaxtlarını səmərəli və mənalı təşkil etməkdən ibarət olub.