Nigar Aslanovanın məruzəsi Vyanada nüfuzlu riyaziyyatçılar tərəfindən müzakirə olunub

Azərbaycan Memarlıq və İnşaat Universitetinin elm və innovasiya məsələləri üzrə prorektoru professor Nigar Aslanova Vyana Texniki Universitetinin professorları Harold Woracek və Benjamin Eichinger tərəfindən təşkil olunmuş "Operatorlar nəzəriyyəsi və approksimasiya" mövzusunda beynəlxalq elmi konfransda iştirak edib. Konfransa Almaniya, Fransa, Avstiya, İtaliya, Rusiya, ABŞ və digər ölkələrdən bir sıra nüfuzlu riyaziyyatçılar qatılıb. 

Professor Nigar Aslanova "Dördüncü tərtib operator əmsallı diferensial operatorların spektral xassələri" mövzusunda məruzə ilə çıxış edib. Məruzəni Bern Universitetinin Riyaziyyat İnstitutunun direktoru professor K.Tretter, prof.P.Eksner və digər görkəmli riyaziyyatçılar da dinləyib. Məruzə dünyanın nüfuzlu riyaziyyatçılarının müzakirələrilə keçirilib və maraqla qarşılanıb.

Konfrans çərçivəsində, həmçinin bir sıra alimlərlə elmi əlaqələr yaradılıb, müasir riyaziyyatın istiqamətləri barədə fikir mübadiləsi aparılıb.