Strateji planlaşdırma şöbəsinin könüllü dəstək qrupunun tələbələrinə sertifikatlar təqdim olunub

Azərbaycan Memarlıq və İnşaat Universitetinin (AzMİU) bir qrup könüllü tələbəsi Strateji planlaşdırma şöbəsi tərəfindən nominasiya və sertifikatlarla mükafatlandırılıb.  

Strateji planlaşdırma şöbəsinin könüllü dəstək qrupuna daxil edilən bu tələbələr beynəlxalq reytinq bazalarında ali təhsil müəssisələri qarşısında qoyulan tələbləri şöbənin əməkdaşları ilə birgə AzMİU-nun rəhbərliyi, akademik və inzibati heyətinə çatdırıb. Gələn sorğuların universitet əməkdaşları tərəfindən vaxtında cavablandırılması, ilkin etapda qeydiyyatdan keçə bilməyən müəllimlərə dəstək göstərilməsində böyük səy və əmək sərf ediblər. Bu fəaliyyətinin nəticəsidir ki, 2024-cü il üzrə açıqlanan nüfuzlu reytinq cədvəllərində AzMİU ötənilki nəticələrini üstələyərək reytinqlərdə irəliləyib.  

Mükafatlandırma mərasimindən öncə çıxış edən şöbənin müdiri Qənirə Məmmədzadə beynəlxalq reytinqlərdə iştirakın universitetimiz üçün vacib məsələ olduğu və bu prosesin kifayət qədər vaxt aparmaqla bərabər mürəkkəbliyinə də toxundu. Bir il davam edən prosesin məşəqqətli olduğunu söyləyən Qənirə Məmmədzadə şöbə tərəfindən tələbələrin cəlbinə ötən ildən başlanıldığı, zamanla sıralarının seyrəldiyini deyib: “Onlardan sona qalan 6 tələbə qarşıya çıxan çətinliklərə baxmayaraq AzMİU üçün önəmli olan çətin və məsuliyyətli işə səbr və təmkinlə yanaşdı, bütün potensiallarını ortaya qoydu. İngilis dilli sorğuların cavablandırılmasında dil bilməyən müəllimlərə xüsusi dəstək göstərdi”.

Sonra Qənirə Məmmədzadə, eləcə də mərasimin xüsusi qonaqları Əcnəbi dillər kafedrasının müdiri Aygün Məmmədova, Keyfiyyət təminatı və monitorinq mərkəzinin müdiri Könül Ağayeva, Elmi-tədqiqat şöbəsinin müdiri Reyhan Əkbərli, Azərbaycan Mədəniyyət və İncəsənət Universitetinin “Gümüş nar” layihəsinin təsisçisi dosent Gülnaz Mədətova fəal tələbələrə təşəkkürlərini bildirib, könüllülük fəaliyyətlərini yüksək qiymətləndirərək gələcək işlərində uğurlar arzulayıblar. 

Mərasimdə dəstək qrupunun üzvlərinə sertifikatlar təqdim olunub, proses müddətində göstərdikləri şəxsi xüsusiyyətlərə görə “ilin ən məsuliyyətli tələbəsi”, “ilin ən gülərüz tələbəsi”, “ilin ən alicənab tələbəsi” ,“ilin ən mehriban tələbəsi”,  “ilin ən kreativ tələbəsi”, “ilin ən təmkinli tələbəsi” kimi müxtəlif nominasiyalara layiq görülüblər. 

Tələbələrdən ikisinə isə həm də Keyfiyyət təminatı və monitorinq mərkəzinə göstərdiyi könüllü dəstəyə görə təşəkkür edilərək sertifikatlar təqdim olunub.  

Yekunda xatirə şəkli çəkdirilib.