Ulu Öndərin anadan olmasının 101-ci ildönümünə həsr olunmuş fakültələrarası şahmat turniri yekunlaşıb

Azərbaycan Memarlıq və İnşaat Universiteti (AzMİU) Tələbə Həmkarlar İttifaqı Komitəsi (THİK) və İdman Klubunun təşkilatçılığı ilə Heydər Əliyevin 101-ci ildönümünə həsr olunmuş fakültələrarası şahmat turniri yekunlaşıb.

8-13 may tarixində bütün fakültələrdən cəlb olunmuş 16 nəfərin iştirak etdiyi turnirə 2 nəfər tələbə (oğlan, qız) seçilməklə komandalar formalaşdırılıb. 

Turnirin sonuncu günü qaliblər müəyyənləşdirilib; I yerə Su təsərrüfatı və mühəndis kommunikasiya sistemləri fakültəsi (STMKS), II yerə Tikinti-iqtisad fakültəsi (TİF), III yerə Mexanika və informasiya texnologiyaları fakültəsi (MİT) layiq görülüb.

Mükafatlandırma mərasimində çıxış edən Sosial məsələlər və ictimaiyyətlə əlaqələr üzrə prorektor Orxan Naqdiyev, THİK-in sədri Şahmar Rəfili çıxışlarında Ulu Öndər Heydər Əliyevin xalqımız qarşısında tarixi xidmətlərini xatırladıb, ona həsr olunan bu turnirdə göstərdikləri fəallığa görə tələbələrə öz təşəkkürlərini bildiriblər. 

Sonda qaliblər diplom və medalla mükafatlandırılıb.

Məlumat üçün qeyd edək ki, turnirin keçirilməsində məqsəd ölkəmizdə şahmatın inkişaf strategiyasının əsasını qoymuş Ulu Öndər Heydər Əliyevin əziz xatirəsini yad etmək və bu intellektual idman növünün tələbələr arasında kütləviliyinə nail olmaqdır.