AzMİU-da “İdeya. Yaradılış. Dizayn – 2024" beynəlxalq müsabiqəsinin laureatları mükafatlandırılıb

Azərbaycan Memarlıq və İnşaat Universitetinin (AzMİU) İtaliya-Azərbaycan Dizayn Mərkəzində Rusiyanın Krasnodar şəhərində “İdeya. Yaradılış. Dizayn – 2024" VIII beynəlxalq yaradıcı iş müsabiqəsində iştirak edən tələbələrə sertifikatlar təqdim olunub. 

Təqdimatda Dizayn fakültəsinin dekanı Fərid Kərimov, Qrafik və Media Dizayn kafedrasının müdiri Təranə Bəkirova, fakültənin tələbələri və müəllim heyəti iştirak ediblər.

Müsabiqədə yer qazanan laureatlara sertifikatlar verilib, xatirə şəkilləri çəkdirilib.

Onu da qeyd etmək vacibdir ki, 2019-cu ildən etibarən hər il mütəmadi keçirilən beynəlxalq müsabiqənin yaradılması və formalaşmasında Qrafik və Media Dizaynı kafedrasının böyük rolu olub. Müsabiqədə müxtəlif sahələr üzrə 42 nəfər tələbəmiz iştirak edib, onlardan 20-si Rusiya Dizaynerlər İttifaqı tərəfindən yüksək qiymətləndirilib. 

Daha sonra yaxın günlərdə Şəki şəhərində Gənclər və İdman Nazirliyi, AzMİU-nun birgə təşkilatçılığı ilə gerçəkləşən “Archi Vision Camp” adlı layihənin hesabat sərgisi baş tutub. 

Sərgidə “Archi Vision Camp”ın maraqlı anlarını əks etdirən videoçarxa baxılıb, layihə müddətində tələbələrin hazırladıqları maketlər nümayiş olunub. Sonda layihənin iştirakçıları olan müəllim və tələbələr çıxışlar edib, öz təəssüratlarını bölüşüblər.