AzMİU-nun elektron kitabxanasındakı kitabların sayı 10 minə çatdırılıb

Azərbaycan Memarlıq və İnşaat Universiteti (AzMİU) Elektron kitabxanasının 5 illik fəaliyyəti ilə bağlı hesabat tədbiri keçirilib. 

Oxu zalında keçirilən tədbirdə universitetin əməkdaşları və Elektron kitabxananın ən fəal tələbələri iştirak ediblər. 

Elektron kitabxana şöbəsinin müdiri Aytən Rəhmanova çıxışında kitabxananın 5 illik fəaliyyət dövründə oxuculara göstərilmiş xidmətlər, ilk dəfə həyata keçirilən layihələr, ictimai-sosial tədbirlər, qazanılmış uğurlar barədə hesabat təqdim edib. 

Şöbə müdiri qeyd edib ki, kitabxanada artıq elektron kitabların sayı 10 minə çatdırılıb. Elektron kataloqun genişləndirilməsi ona müraciət edən oxucuların lazım olan kitabı sürətli şəkildə əldə etməsinə imkan yaradıb. 

Pandemiya dövrü də daxil olmaqla şöbənin əməkdaşları müntəzəm olaraq oxuculara yüksək səviyyədə xidmət göstərib. Elektron kitabxana istifadəçilərinə https://library.azmiu.edu.az/index.php saytından düzgün istifadə, qeydiyyatdan keçmək, e-kitabların yüklənməsi barədə məlumat verib. İstifadəçi sorğuları e-mail ünvanı və sosial şəbəkələr vasitəsilə mütəmadi cavablandırılıb.

Çıxışın yekununda Aytən Rəhmanova ötən 5 ildə kitabxananın işinə göstərdiyi dəstəyə və sıx əməkdaşlığa görə AzMİU-nun müvafiq şöbələri və kafedralarına, tələbə təşkilatlarına, aktiv oxucularına təşəkkür edib.

Tədbirdə iştirak edən AzMİU-nun əməkdaşları və oxucular elektron kitabxananın 5 illik fəaliyyətini müsbət dəyərləndirib, gələcək fəaliyyətində uğurlar arzulayıblar.