Akademik heyət üçün "Müasir təlim metodikaları" mövzusunda seminar keçirilib

Azərbaycan Memarlıq və İnşaat Universitetinin (AzMİU) Keyfiyyət Təminatı və Monitorinq Mərkəzi  Azərbaycan Dövlət Pedaqoji Universitetinin Təlim-Tədris Mərkəzi ilə  birgə "Müasir təlim metodikaları" mövzusunda seminar keçirib.

AzMİU-nun professor-müəllim heyəti üçün  nəzərdə tutulan seminarın əsas məqsədi  fəal-interaktiv təlim metodlarının akademik heyət  tərəfindən mənimsənilməsinə şərait yaratmaq,  keyfiyyətli təlim-tədris prosesinin təşkili işinə dəstək göstərməkdir.

Seminarı AzMİU-nun Tədris işləri üzrə prorektoru professor Akif Qasımov açaraq güclü rəqabət mühitində  bazar iqtisadiyyatının tələblərinə uyğun  savadlı, bacarıqlı kadrların yetişdirilməsində müəllimlərin məsuliyyətli və vacib rolundan danışıb. Prorektor qeyd edib ki, bütün  sahələr kimi təhsil sahəsində də mütərəqqi metodların tətbiq olunması bu sahədə   keyfiyyətin  yüksəldilməsi və səmərəliliyin artırılmasına güclü təsir edir. Təhsil sistemində aparılan islahatlar müasir dərsin məzmununun təkmilləşdirilməsi, yeni təlim texnologiyalarının tətbiqini tələb edir. İnteraktiv təlim metodlarından istifadə təhsilin keyfiyyətinə öz müsbət təsirini göstərir. Müəllimlərin öz üzərində çalışmaq,  bilik və təcrübələrini gənclərlə paylaşmaq kimi məsələləri ön plana çıxarır.  

Prorektorun çıxışından sonra seminarda Azərbaycan Dövlət Pedaqoji Universitetinin Təlim-Tədris Mərkəzinin direktoru  Xalidə Həmidova  və Mərkəzin əməkdaşı Rumiyyə Camalova  məruzə ilə çıxış ediblər. Yeni tədris metodikaları,  onların müxtəlif ixtisasların mühazirə və məşğələ dərslərində tətbiq olunması istiqamətləri barədə geniş məlumat veriblər.

AzMİU-nun  müəllimləri də seminarda müzakirə olunan mövzular ətrafında  çıxış edərək  öz bilik və bacarıqlarını bölüşüblər. 

Seminar universitetin professor-müəllim heyəti ilə təlim keçənlər arasında elmi-pedaqoji fikir mübadiləsi ilə başa çatıb.