“Dizayn dediyin belə olar!” – Peşəkarlarla tələbələrin görüşü təşkil olunub

Azərbaycan Memarlıq və İnşaat Universitetində (AzMİU) Tələbə Həmkarlar İttifaqı Komitəsinin nəzdində fəaliyyət göstərən “Buziness Club”  və  “Archeda Group”un təşkilatçılığı ilə “Dizayn dediyin belə olar!” adlı təlim-seminar keçirilib. 

200-ə yaxın tələbənin iştirak etdiyi seminarın məqsədi dizayn ixtisası üzrə təhsil alan tələbələri bu sahənin incəlikləri, yenilikləri ilə bağlı məlumatlandırmaq olub.

AzMİU THİK-nın sədri Şahmar Rəfili belə təlim xarakterli seminarların keçirilməsinin universitetdə artıq ənənə halını aldığını vurğulayıb, tələbələrin öz ixtisaslarını daha yaxşı mənimsəmələrinə, ixtisasları üzrə gələcək fəaliyyətlərinə və praktiki vərdişlərə yiyələnmələrinə müsbət təsir edə biləcəyinə qeyd edib.

Təlimdə AzMİU-nun məzunu, dizayner Afaq Həşimli və Mustafa Yusifov çıxış ediblər. Hazırkı dövrdə dizayn inkişafının tendensiyalarından, dizaynın sosial sferada rolundan danışıblar.

Daha sonra Əsmər Zöhrablı interyer dizayn, Aytac İsmayılzadə isə qrafik dizayn üzrə tələbələrə təlim keçiblər. İş qabiliyyəti ilə yanaşı, zövqü, ideyaları formalaşdıran dizayn sahəsində daha sürətli inkişaf etməyin sirləri izah olunub.

Tələbələrlə diskussiya şəklində davam edən seminarda onları maraqlandıran suallar əhatəli cavablandırılıb.

Qeyd edək ki, 2024/2025-ci tədris ilindən başlayaraq AzMİU-da Dizayn fakültəsi yaradılacaq və universitetin Memarlıq fakültəsinin tərkibində tədris olunan dizayn ixtisasları yeni fakültəyə veriləcək. Bunu AzMİU-nun rektoru professor Gülçöhrə Məmmədova universitetdə dizayn kafedrasının yaradılmasının 25 illiyinə həsr olunan Dizayn Sərgisində ictimaiyyətə açıqlayıb. 

Məlumat üçün bildirək ki, AzMİU-da dizayn ixtisası üzrə kadr hazırlığına 1994-cü ildən başlanılıb. 1998-ci ildə “mühit dizaynı” ixtisası üzrə ilk bakalavr, 2000-ci ildə isə magistr buraxılışları reallaşdırıldı. Universitetdə dizayn ixtisasının yaradılmasından sonra bu istiqamətdə tədqiqatlar başladılıb, beynəlxalq əməkdaşlıqlar qurulub. Xüsusilə qeyd etmək lazımdır ki, xarici təcrübəni daha dərindən öyrənmək üçün 2018-ci ildə Azərbaycan və İtaliya Prezidentlərinin iştirakı ilə imzalanan “Azərbaycan Memarlıq və İnşaat Universiteti ilə İtaliyanın Milan Politexnik Universiteti arasında Anlaşma Memorandumu”na əsasən universitetdə İtaliya-Azərbaycan Dizayn Mərkəzi yaradılıb. Azərbaycanda dizayn üzrə ali təhsilin Avropa standartlarına uyğun formalaşdırılmasında bu mərkəzin böyük əhəmiyyəti oldu. Mərkəzdə başladılan və uğurla davam etdirilən əlaqələr nəticəsində AzMİU ilə Milan Politexnik Universiteti arasında dizayn ixtisası üzrə ikili diplom proqramına başlanılıb və bu proqram davam edir.