AzMİU-nun müəllimləri Özbəkistanın Kokand Universitetində səfərdə olublar

Azərbaycan Memarlıq və İnşaat Universitetinin (AzMİU) Əcnəbi dillər kafedrasının müəllimləri Orhun mübadilə proqramı çərçivəsində Özbəkistanın Kokand Universitetində səfərdə olublar.

Səfər proqramı çərçivəsində kafedranın müəllimləri Nərgiz Həşimova və Nigar Ağayeva Kokand Universitetinin İqtisadiyyat və təhsil fakültəsinin rəhbər heyəti ilə görüşüblər. Kokand Universitetinin prorektoru Qafurcan Zahidov, Dünya dilləri kafedrasının müdiri Nadir Şarafutdinov, koordinator Uluqbek Mamadaliyev və digər əməkdaşlarla səmərəli müzakirələr aparıblar. Görüşlərdə Azərbaycan və Özbəkistan arasında sıx dostluq və tərəfdaşlıq münasibətlərinə diqqət çəkilib, AzMİU və Kokand Universitetlərinin elm və təhsil sahəsində əlaqələrinin genişləndirilməsi, gələcək əməkdaşlıq məsələlərinə toxunulub. Orhun mübadilə proqramının hər iki universitetə müəllim-tələbə mübadiləsində qarşılıqlı öyrənmə və təcrübə baxımından yeni imkanlar qazandırdığını söyləyiblər. 

AzMİU əməkdaşları səmimi qarşılanmaya və qonaqpərvərliyə görə universitet rəhbərliyinə və kollektivinə təşəkkürünü bildiriblər. 

Eyni zamanda AzMİU-nun əməkdaşları Kokan Universitetinin Dünya dilləri kafedrasının müəllimləri ilə ünsiyyətdə olub, qarşılıqlı fikir mübadiləsi aparıb, tələbələrə ingilis dili fənni üzrə praktik dərslər keçiblər.