Futzal üzrə AzMİU birincisi məlum oldu - Nəqliyyat fakültəsinin komandası turnirin qalibidir

Azərbaycan Memarlıq və İnşaat Universitetində (AzMİU) ümummilli lider Heydər Əliyevin 100 illik yubileyinə həsr edilmiş fakültələrarası futzal turnirinin bağlanış mərasimi keçirilib.
Aprel ayının 7-dən start verilən yarışda AzMİU-nun bütün fakültələrindən, eləcə də universitetin nəzdində fəaliyyət göstərən İnşaat Kollecindən komandalar təmsil olunub. 
AzMİU-nun İdman Kompleksində keçirilən yarışın finalında Nəqliyyat fakültəsinin komandası ilə Su təsərrüfatı və mühəndis kommunikasiya sistemləri fakültəsinin komandası qarşılaşıb. Mübarizədə qələbə qazanan nəqliyyatçılar çempionatın qalibi olublar.
Su təsərrüfatı və mühəndis kommunikasiya sistemləri  fakültəsinin komandası isə bu turnirdə II yerlə razılaşmalı olub. 3-cülük İnşaat fakültəsinin komandasına nəsib olub.
Universitetin Tələbə Həmkarlar İttifaqı Komitəsinin təşkilatçılığı ilə keçirilən yarışın yekununda  I, II, III yerləri tutan komandalar diplom, kubok və qiymətli hədiyyələrlə mükafatlandırılıb. 
Mükafatları AzMİU-nun  Sosial məsələlər və ictimaiyyətlə əlaqələr üzrə prorektoru Orxan Naqdiyev, Tələbə həmkarlar ittifaqı komitəsinin sədri Bayram Aslanov və fakültə dekanları  təqdim ediblər.
Çempionatda fərqlənən 3 futbolçu tələbə - İnşaat fakültəsinin tələbəsi Vəkil Eminov  “Ən məhsuldar oyunçu”, Nəqliyyat fakültəsinin tələbəsi Samir Paşayev “Ən gənc oyunçu”, Su təsərrüfatı və mühəndis kommunikasiya sistemləri fakültəsinin tələbəsi Anar Yaqubov  “Ən yaxşı qapıçı” nominasiyaları üzrə xüsusi mükafatla təltif olunublar.