Dizayner ixtisası üzrə təhsil alan tələbələrin nəzərinə: MÜSABİQƏ VƏ QİYMƏTLİ HƏDİYYƏLƏR VAR - 12.04.2023

Azərbaycan Memarlıq və İnşaat Universitetinin (AzMİU) Memarlıq fakültəsinin dizayn ixtisası üzrə təhsil alan tələbələri üçün məlumatlandırıcı sessiya keçirilib.

İtaliya-Azərbaycan Dizayn Mərkəzinin təşkil etdiyi tədbirdə “NB Holding” ASC-nin Marketinq  departamentinin müdiri Mahir Quliyev  təmsil etdiyi şirkət barədə prezentasiya ilə çıxış edib. O, şirkətin istehsal etdiyi məhsullar - inşaat boyaları, sənaye boyaları, epoksi döşəmə örtükləri, mebel boyaları, keramik  yapışdırıcılar, izolyasiya materialları, sement və gips əsaslı məhsullar, quru və maye yuyucu vasitələr, sabunlar, ünvan lövhələri və istiqamət dirəklərindən danışıb. Qonaq şirkət daxilində yerləşən laboratoriyalar barədə də məlumat verib, keramoqranit istehsalında şirkətin Azərbaycanda ilk və yeganə təmsilçi olduğunu qeyd edib, məhsulun hazırlanma mərhələlərini tələbələrə nümayiş etdirib.

Sessiya zamanı şirkətin daxili brendi “RE-TAŞ” inşaat marketin elan etdiyi dizaynerlər üçün yarışdan da danışıb və tələbələri müsabiqədə aktiv iştiraka səsləyib.

Görüşün sonunda dizaynerləri maraqlandıran suallar şirkət nümayəndəsi tərəfindən cavablandırılıb.

“RE-TAŞ” inşaat marketi tərəfindən elan edilən müsabiqənin şərtləri:

1. “re_tas_insaatmarket” instagram səhifəsini izləmək;

2. “RE-TAŞ” Ceramic markasına aid olan keramoqranit teksturalarından istifadə etməklə dizayn həlli tərtib etmək;

3. Hazırlanmış işləri [email protected] elektron ünvanına ad, soyad, mobil nömrə və keramoqranitin kodu ilə göndərmək.

Göndərilən işlər “re_tas_insaatmarket” instagram səhifəsində yerləşdiriləcək. Professional münsiflər heyəti tərəfindən seçilmiş işlər 21 may tarixində keçiriləcək final mərhələsinə vəsiqə qazanacaq. Qaliblər müəyyən edilərək sertifikat və dəyərli hədiyyələrlə təltif ediləcəkdir.

Final mərhələsində münsiflər heyətinin səsverməsindən əlavə olaraq instagram səhifəsindən gələn “Like”lar da nəzərə alınacaqdır.

Münsiflər heyəti Azərbaycan Memarlıq və İnşaat Universiteti, Azərbaycan Dövlət Mədəniyyət və İncəsənət Universiteti, Azərbaycan Dövlət Rəssamlıq Akademiyasından olan müəllimlərdən ibarətdir.

Mükafatlar:

1-ci yer Apple İphone; 13-128GB;

2-ci yer Apple watch;

3-cü yer 31.5´Full HD monitor 60 Hz;

Əlavə olaraq 4-cü və 5-ci yerlərin sahiblərinə həvəsləndirici mükafatlar təqdim olunacaq.

Finalçıların hər birinə isə münsiflər heyəti tərəfindən sertifikatlar veriləcək.

Yarış barədə ətraflı məlumat üçün linkə daxil ola bilərsiniz:

https://drive.google.com/file/d/1JYf-QoxnINeIac-M-fBdHIpGjR7PxsOW/view?usp=share_link

Keramoqranit teksturaları yükləmək üçün linkə daxil ola bilərsiniz:

https://drive.google.com/drive/folders/11XkPI7xNnZxD7aN2boGjZmR0N2PiVIxp?usp=share_link