AzMİU ilə Özbəkistanın daha iki universiteti arasındakı əməkdaşlıq genişləndirilir [20.12.2022]
| Azərbaycan Memarlıq və İnşaat Universitetinin (AzMİU) Mühəndis sistemləri və qurğularının tikintisi kafedrasının müdiri, professor Nurməmməd Məmmədov Özbəkistanın İslam Kərimov adına Daşkənd Dövlət Texniki Universitetində ezamiyyətdə olub. Ezamiyyətin məqsədi iki universitet arasında əlaqələrin qurulması, inkişaf etdirilməsi və elmi-pedaqoji əməkdaşlıq üçün memorandomun imzalanması olub. Səfər çərçivəsində Nurməmməd Məmmədov Daşkənd Dövlət Texniki Universitetinin rəhbərliyi ilə görüşlər keçirib, AzMİU, o cümlədən universitetin ixtisasları, potensialı, imkanları, elmi-texniki naliyyətləri, xarici əlaqələri haqqında geniş məlumat verib. Görüş zamanı, həmçinin işğaldan azad olunan ərazilərimizdə aparılan tikinti quruculuq işləri, həmin ərazilərdə yaşıl iqtisadiyyatın komponentlərindən olan yaşıl enerji strukturunun qurulmasından bəhs olunub. Nurməmməd Məmmədov Daşkənd Dövlət Universitetinin Energetika fakültəsində 2 mövzuda geniş təqdimatla çıxış edib. "Zəngəzur: əvvəl və sonra", "İnşaatda enerji səmərəliliyi qlobal ənənə kimi" mövzularında edilən çıxışlar zamanı hər iki mövzu ətrafında müzakirələr təşkil olunub, bu istiqamətlərdə Azərbaycan və Özbəkistan təcrübələri ilə bağlı fikir mübadiləsi aparılıb. Səfər zamanı Nurməmməd Məmmədov Daşkənd Memarlıq və İnşaat Universitetində də olub. Burada universitin laboratoriyaları ilə tanışlıq olub və rektorla görüş keçirilib. Görüşdə qarşılıqlı əməkdaşlıq, qlobal təhsil çağrışları, təhsil islahatları və bu kimi mövzularda müzakirələr aparılıb və qərara alınıb ki, AzMİU ilə Daşkənd Memarlıq və İnşaat Universiteti arasında əməkdaşlıq gücləndirilsin. Qeyd edək ki, AzMİU ilə Özbəkistan universitetləri, xüsusilə texniki ali təhsil müəssisələri arasında səmərəli əməkdaşlıq əlaqələri mövcuddur. Bu əlaqələrə əsasən beynəlxalq təhsil proqramlarında birgə fəaliyyət, tələbə mübadiləsi, qarşılıqlı səfərlərin təşkili, təcrübə mübadiləsi və bu kimi önəmli əməkdaşlıqlar həyata keçirilir. |
20-12-2022
Gələcəyinizi birlikdə inşa edək!
11 Ayna Sultanova, Baku
(+994 12) 539 10 45|[email protected]
