Ramazan bayramınız mübarək! [02.05.2022]

                       
     Bu gün bütün dünya müsəlmanları İslam təqviminin ən  əziz günü - mübarək Ramazan bayramını qeyd edir. Savab, ülfət ayı olan Ramazan əsrlər boyunca bəşər övladına dözüm, mərhəmət, Allahın yaratdıqları arasında münasibətlərdə xeyirxahlıq təlqin edir. Ramazanın müqəddəsliyi Quranın məhz bu ayda nazil olması ilə bağlıdır. İlahi hikmətlər xəzinəsi “Qurani-Kərim”in hidayət yolu olaraq bəşəriyyətə göndərildiyi Ramazan ayı insanları saflığa və mərhəmətə dəvət edir.
     Xoşbəxt xalqıq ki, mübarək Ramazan ayını bu il də böyük qürur və fərəh hisləri ilə qalib kimi yola salırıq. Ali Baş Komandanın liderliyi ilə düşmən tapdağından azad edilən Qarabağ torpaqlarımızda bu gün azan sədaları ucalır, namazlar qılınır, xalqımızın rifahı və tərəqqisi naminə arzular dilənir. Orucluğun sınaqlarından alnıaçıq, üzüağ  çıxan vətəndaşlarımız bayram sevincini bölüşür, dövlətimizin rifahı və tərəqqisi üçün diləklər edir, Vətən uğrunda canından keçmiş şəhidlərimizin ölməz ruhuna dualar oxunur.  Əminik ki, həm deyilən bu arzular, həm də oxunan dualar Tanrı dərgahında qəbul ediləcək.
     Əziz müəllimlərimiz, əməkdaşlarımız, tələbələrimiz, Sizi dünya müsəlmanlarının əziz bayramı–müqəddəs Ramazan bayramı münasibəti ilə səmimi qəlbdən təbrik edirik, ailələrinizə xoşbəxtlik, süfrələrinizə bol ruzi və xeyir-bərəkət arzulayırıq. Arzu edirik ki, Ramazan bayramı hər birinizin sevincinə səbəb olsun və bu bir ay ərzində edilən bütün xeyir-dualar gələn Ramazana qədər gerçəkləşsin!