Rektor respublika birincisi olan AzMİU Debat Klubunun üzvləri ilə görüşüb

     Azərbaycan Memarlıq və İnşaat Universitetinin (AzMİU) rektoru, professor Gülçöhrə Məmmədova 2021-ci ilin qış sessiyası Bakı Gənclər Debat Forumunun qalibi olan Universitetin Debat klubunun komandası ilə görüşüb. Görüşdə Universitetin Tədris işləri üzrə prorektoru Akif Qasımov, Tələbə Həmkarlar İttifaqı Komitəsinin (THİK) sədri Bayram Aslanov, THİK-in sədr müavini Şahmar Rəfili iştirak edib. 
     Görüşdə THİK-in sədri B.Aslanov AzMİU-nun Debat klubunun  fəaliyyətindən danışıb, tələbələrimizin mütəmadi olaraq debat yarışlarına qatıldıqlarını və universiteti hər zaman layiqincə təmsil etdiklərini deyib. B.Aslanov məlumat verib ki, Gənclər və İdman Nazirliyi, Vətəndaş Cəmiyyətində Debat İctimai Birliyinin birgə təşkilatçılığı ilə  keçirilən yarışa universitetin Azərbaycan bölməsi üzrə 3,  rus bölməsi üzrə 2 komandası qatılıb. Aprelin 7-də keçirilən final mərhələsinə vəsiqə qazanan “Hər ehtimala qarşı” komandamız finala yüksələn Azərbaycan Tibb Universitetinin debatçılarını geridə qoyaraq respublika birincisi olub. 
     Universitetin Debat klubunun sədri Orxan Əliyev turnirin “Ən yaxşı məşqçisi” seçilib, medal və sertifikatlarla təltif olunub. Qalib komandanın digər üzvləri Nöfəl Məmmədli, Vüqar Məmmədov və Sənan Atayev də medal və kuboka layiq görülüblər. 
     Klubun üzvləri ilə keçən səmimi görüşdə  rektor  tələbələrimizi qazandıqları qalibiyyət münasibətilə təbrik edib, uğurlarının davamlı olmasını arzulayıb.