AzMİU-da  Elmi Şuranın növbəti iclası keçirilib

                        
          Bu gün Azərbaycan Memarlıq və İnşaat Universitetində (AzMİU) Elmi Şuranın növbəti iclası keçirilib. İclasda 2021-2022-ci tədris ilində bakalavr və magistr səviyyələrində qəbulun nəticələri müzakirə olunub. 
          İclası giriş sözü ilə açan universitetin rektoru, professor Gülçöhrə Məmmədova  şura üzvlərini salamlayıb. Gündəlikdəki məsələləri diqqətə çatdırmazdan əvvəl rektor bu ilin sentyabrında vəfat edən Elmi Şuranın üzvü, universitetin dosenti, dəyərli alim, əsl ziyalı Arif Hacıyevdən danışıb, mərhum haqqında xoş sözlər deyib, xatirəsinin bir dəqiqəlik sükutla yad edilməsini təklif edib. 
           Universitetin ümumi işlər üzrə prorektoru vəzifəsinə yeni təyin olunan Aqil Məmmədovu şura üzvlərinə təqdim edəndən sonra rektor İnşaat-texnologiya fakültəsinin dekanı, professor Tahirə Haqverdiyevanı və Mühəndis sistemləri və qurğuları kafedrasının müdiri, dosent Nurməmməd Məmmədovu yubileyləri münasibəti ilə təbrik edib, keçdikləri ömür yoluna nəzər salıb, hər ikisinə həyatda uğurlar arzulayıb.  
          Gündəlikdəki ilk məsələ ilə bağlı Qəbul komissiyasının rəhbəri Surxay Əliyev çıxış edib. “2021/2022-ci tədris ilində bakalavr səviyyəsində qəbul imtahanlarının nəticələri, yeni dərs ilində universitetin reytinqinin və cəlbediciliyinin artırılması”  mövzusunda hesabatdan məlum olub ki, yeni tədris ilində AzMİU-da 1970 plan yerinə 1624 tələbə qəbul olub, universitetin planı 83 faiz dolub. Fakültələr və ixtisaslar üzrə qəbulun nəticələrindən danışan S.Əliyev növbəti tədris ili üçün tələbə qəbulu proqnozuna dair əsaslandırılmış təkliflərini səsləndirib. Komissiyanın rəhbəri universitetin nəzdindəki İnşaat kollecinə qəbuldan da danışıb, bildirib ki, kollecdə 565 plan yerinə 550 tələbə qəbul olub, qəbul planı 97 faiz dolub. 
          Magistratura Mərkəzinin rəhbəri Rövşən Səmədov yeni tədris ilində magistratura səviyyəsində qəbulun nəticələri barədə hesabat təqdim edib. R.Səmədov da universitetin təbliğatını arzu olunan səviyyədə qurmaq,  Universitetin reytinqini və cəlbediciliyini  artırmaq barədə maraqlı təkliflərlə çıxış edib. Hər iki hesabat ətrafında diskussiya aparılıb, qəbulda ortaya çıxan problemlərin aradan qaldırılması üçün çıxış yolları müzakirə olunub. 
            Şura iclasında digər cari məsələlərə də baxılıb və müzakirəyə çıxarılan məsələlər ətrafında Şura üzvləri çıxışlar ediblər, təklif və rəylər dinlənilməklə müvafiq qərarlar qəbul edilib.