AzMİU-da onlayn imtahan sessiyasının birinci mərhələsi başlayıb

          Azərbaycan Memarlıq və İnşaat Universitetində (AzMİU) bu gün  2019/20- ci tədris ilinin yay imtahan sessiyasının birinci mərhələsinə start verilib. Onlayn rejimdə test və yazılı üsulla keçirilən imtahanlarda I-III kursun tələbələri iştirak edir. İmtahanlara İKT mərkəzində xüsusi təlim keçmiş proktorlar nəzarət edir.

          AzMİU-nun İKT mərkəzindən aldığımız məlumata görə, 13 fəndən onlayn test imtahanlarında bakalavriat səviyyəsində təhsil alan 31 qrup üzrə 699 tələbə iştirak edir. 3 qrup üzrə isə 52 tələbə 2 fəndən onlayn yazılı imtahanlara qatılıb.

          AzMİU Elmi Şurasının qərarına əsasən, test üsulu ilə imtahanlar fənnin yalnız baza testləri əsasında (analoq və açıq testlər istifadə olunmadan) aparılır. Yazılı imtahan biletlərinə isə məzmunun əsas və ən vacib hissəsini əhatə edən suallar salınıb. Bu zaman sualların sayı universitet rektorunun 02.04.2020-ci il tarixli 139/t-d əmrinə əsasən 25-30 %-dək azaldılıb.

          Onu da xatırladaq ki, AzMİU-da  buraxılış kurslarında təhsil alan tələbələrin alt dərs və təkrar imtahanları iyunun 4-də keçirilib. Onlayn rejimdə test və yazılı üsulla keçirilən imtahanlarda tələbələrin 91 %-i imtahanı müvəffəqiyyətlə verib.