AzMİU-da buraxılış işlərinin müdafiəsinə hazırlıq gedir

           Xəbər verdiyimiz kimi, Azərbaycan Memarlıq və İnşaat Universitetində (AzMİU) onlayn dərslər artıq yekunlaşıb, 2019/2020-ci tədris ilinin yaz semestrinin imtahan sessiyasına start verilib. İyunun 4-dən etibarən universitetin buraxılış kursunda təhsil alan məzun tələbələrin alt dərs və təkrar imtahanları başlayıb, proses bu ayın 14-dək davam edəcək. Eyni zamanda fakültələrdə 4-cü kurs tələbələrinin buraxılış işlərinin müdafiəsinə hazırıq gedir. İyunun 10-12-dək  buraxılış işlərini müvafiq kafedralara təhvil verən son kurs tələbələri iyunun 16-dan buraxılış işlərinin müdafiəsinə başlayacaqlar. Proses iyulun 4-nə qədər davam edəcək.   

           Memarlıq fakültəsinin dekanı, professor Zahidə Məmmədovadan aldığımız məlumata görə, müdafiə günləri qruplar üçün  təyin edilmiş qrafik üzrə yerinə yetiriləcək. IV kursda təhsil alan 203 tələbədən 155 nəfəri buraxılış işinin müdafiəsinə buraxılacaq. Ötən semestrlərdən kəsiri olan 35 tələbənin isə kəsirini ödədikdən sonra müdafiəyə qatılımaq şansı var. Müdafiyə buraxılan tələbələrdən 122-si memarlıq, 68 nəfəri isə dizayn ixtisasında təhsil alıb.

             Məlumat üçün onu da qeyd edək ki, buraxılış işlərinin müdafiəsi onlayn rejimdə ZOOM proqramı vasitəsilə keçiriləcək. Eyni zamanda müdafiədə məzun tələbələrə müəyyən güzəştlər nəzərdə tutulub. Belə ki, AzMİU-nun Elmi Şurasının qərarına görə, buraxılış işlərinin tərkibi və izahat yazısı 30%-ə qədər azaldılıb. Tələbələrin Universitet daxilində az təmasda olması məqsədi ilə buraxılış işinin rəhbəri öz rəyini və 2-ci oponnent rəyinin  hazırlanmsını təmin edib.